ខ្សែប្រយុទ្ធ Joao Felix មានចេតនាចង់ទៅឲ្យក្លឹប Barcelona។ នេះបើតាមសម្ដីផ្ទាល់របស់កីឡាករវ័យ ២៣ ឆ្នាំ ប្រាប់ទៅកាន់អ្នកសារព័ត៌មាន Fabrizio Romano។
elix បាននិយាយថា Barcelona គឺជាជម្រើសទីមួយសម្រាប់រូបគេ ហើយរូបគេពិតជាចង់ចូលរួមជាមួយក្លឹបមួយនេះ។ កីឡាករព័រទុយហ្គាល់បានបន្តថា ការលេងឲ្យ Barca គឺជាសុបិនរបស់គេតាំងពីតូចមក ហើយបើសិនជាបានឱកាសលេងឲ្យ Barca នោះសុបិនរបស់រូបគេនឹងក្លាយជាការពិត។
មិនទាន់មានរបាយការណ៍ណាមួយដែលអាចបញ្ជាក់ថា Barca ឆ្លើយតបយ៉ាងណាឡើយចំពោះពាក្យសម្ដីសាធារណៈបែបនេះរបស់ Felix។
Felix បានមកចូលរួមជាមួយ Atletico Madrid កាលពីខែកក្កដា ឆ្នាំ២០១៩ ក្នុងតម្លៃផ្ទេរប្រមាណ ១៣០លានអឺរ៉ូ។ តម្លៃនេះធ្វើឲ្យកីឡាករព័រទុយហ្គាល់ស្ថិតក្នុងចំណោមកីឡាករដែលមានតម្លៃផ្ទេរថ្លៃបំផុតក្នុងប្រវត្តិសាស្ត្របាល់ទាត់។
កីឡាករលេងសរុបឲ្យក្លឹបអេស្ប៉ាញចំនួន ១៣១ ប្រកួត និងស៊ុតចូល ៣៤ គ្រាប់។ កាលពីមកចូលរួមពីរ-បី រដូវកាលដំបូងៗ កីឡាករបានបង្ហាញទម្រង់លេងយ៉ាងល្អឲ្យក្លឹប បើទោះជាមានបញ្ហាខ្លះដូចជាបញ្ហារបួសជាដើម។ ទោះជាយ៉ាងណា កាលពីអំឡុងចុងឆ្នាំមុន កីឡាករផ្ដើមមានបញ្ហាធ្ងន់ធ្ងរធ្វើការមិនកើតជាមួយលោក Diego Simone ដែលជាអ្នកចាត់ការ AT Madrid។
ដោយបញ្ហានេះ មានការបាចទឹកដាក់គ្នារវាងភាគីទាំងពីរជាពិសេសពេលសម្ភាសន៍ជាមួយអ្នកសារព័ត៌មាន ដែលធ្វើឲ្យការជានាគ្នាមានការលំបាក ហើយជាលទ្ធផល Felix មិនអាចបន្តនៅជាមួយ AT បាន។
ក្រោយពិភាក្សាគ្នា ភាគីក្លឹប និងភាគីកីឡាករសម្រេចផ្ទេរទៅលេងនៅ Chelsea ក្នុងនាមជាកីឡាករខ្ចីជើងកាលពីខែមករាដើមឆ្នាំនេះ។ ទោះជាយ៉ាងណា ដោយ Chelsea កំពុងមានបញ្ហាផ្សេងៗ ហើយធ្លាក់ទម្រង់លេង កីឡាករ Felix ក៏លេងមិនសូវបានល្អឡើយ ដោយលេងបានតែ ២០ លើក និងស៊ុតចូល ៤ គ្រាប់ប៉ុណ្ណោះ។ ទម្រង់លេងបែបនេះ Chelsea មិនទទួលយកបានឡើយ រួចក៏សម្រេចបញ្ជូន Felix ឲ្យ AT Madrid វិញ។
នាពេលនេះ សេចក្ដីរាយការណ៍ជាច្រើនបានលើកឡើង Felix កំពុងរិះរកវិធីចេញពី AT។ ទោះជាយ៉ាងណា ប្រភពសាធារណៈមួយចំនួនបានឲ្យដឹងថា មានតែក្លឹបអង់គ្លេស Aston Villa មួយប៉ុណ្ណោះដែលកំពុងចាប់អារម្មណ៍ និងចង់ដាក់សំណើផ្ទេរយក Felix៕
ប្រភព៖sabaynews
