ជំនួបនៅ Saudi Pro League កាលពីទៀបភ្លឺថ្ងៃសោរ៍កន្លងទៅ រវាងម្ចាស់ផ្ទះក្លឹប Al-Nassr ទល់ក្លឹបភ្ញៀវ Al-Ahli បានបណ្តុំទៅដោយ Super star មកពីអឺរ៉ុបជាច្រើន តួយ៉ាងដូចជា Cristiano Ronaldo, Sadio Mane, Marcelo Brozovic, Riyad Mahrez, Roberto Firmino និង Edouard Mendy ជាដើម។ យ៉ាងណាលទ្ធផលបញ្ចប់ ៩០ នាទី ខាង Al Nassr បានយកឈ្នះ ៤-៣ ទៅលើ Al-Ahli តែក៏កើតមានរឿងរ៉ាវគួរឲ្យចាប់អារម្មណ៍ច្រើនផងដែរ។
ជាក់ស្តែងទាំងគ្រាប់បាល់របស់ Ronaldo ទាំងគ្រាប់របស់ Talisca សុទ្ធសឹងតែមានរឿងត្រូវលើកមកជជែក ហើយក្នុងនោះក៏ពាក់ព័ន្ធនឹង Mane ដែលមួយរយៈពេលចុងក្រោយ ឃើញរំលេចស្នាមញញឹម ភាពសប្បាយរីករាយច្រើន ដល់តែយប់ទល់ Al-Ahli សប្បាយជ្រុល ប៊ិះតែនឹងកើតរឿងទៅវិញ។
យើងទៅមើលមួយក្នុងចំណោម ២ គ្រាប់ ដែលកីឡាករព័រទុយហ្គាល់ រកបាន ភ្ញាក់ផ្អើលខ្លាំងត្រង់គ្រាប់បាល់ដំបូងនៅនាទីទី ៤ ដែលទទួលបានការបញ្ជូន Assist ចេញពីជើងដៃគូដៃកង់ Sadio Mane ហើយលោកអូសបាល់នោះចូលប្រអប់ ស៊ុតប្រើជើងឆ្វេង មិនមែនជាជើងជំនាញ ចូលទីមិនគួរឲ្យជឿ ក៏ដោយសារពេលនោះ តំបន់ប្រអប់ត្រូវបានរុំព័ទ្ធដោយផ្សែង ជារួមមើលមិនឃើញទាំងសម្រាប់អ្នកចាំទី ដូចគ្នាទាំងអ្នកស៊ុត តែបើកីឡាករមិះមិនត្រូវក៏តម្រង់បាល់នោះមិនឲ្យចូលទីកើតដែរ។
បន្ទាប់ចប់ការប្រកួត ខ្សែប្រយុទ្ធចាស់វស្សាវ័យ ៣៨ ឆ្នាំ ក៏បានឆ្លើយតបទៅនឹងមតិរិះគន់ពីអ្នកគាំទ្រមួយចំនួន យ៉ាងដូច្នោះថា៖ “ពួកគេលើកឡើង Ronaldo ចូលមកដល់ទីបញ្ចប់ហើយ ទាំងអស់នេះវាមិនមែនជាការពិតទេ សម្រាប់ខ្ញុំ ខ្ញុំនឹងបន្តលេងរហូតដល់ជើងទាំងសងខាងនិយាយប្រាប់ខ្ញុំ ថាពួកគេទៅលែងរួច មកទល់ពេលនេះខ្ញុំនៅតែមានចិត្តចង់ឈ្នះ មានចិត្តក្នុងការបន្តស្វែងរកគ្រាប់បាល់ជាច្រើន”។
ដោយឡែករឿងដែលមិនច្បាស់ថាគួរសើច ឬយំសម្រាប់ Sadio Mane គឺត្រង់គ្រាប់បាល់ទីពីររបស់ Talisca សម្រេចនៅនាទី ៤៥+៦ មុនបញ្ចប់តង់ទីមួយ គេបានបញ្ចេញកាយវិការដែលនាំឲ្យខាងសមាជិកក្លឹប Al-Ahli ជាពិសេសអ្នកអង្គុយបម្រុងខាងក្រៅទីលាន មានអារម្មណ៍ឡាំប៉ាជាខ្លាំង ពោលបន្ទាប់តែ Mane រត់ទៅអបអរ តាមរយៈការលោតអោបក Roberto Firmino ជាសមាជិកខាងក្លឹបភ្ញៀវ។
យើងមិនច្បាស់ថា Mane គិតឃើញបែបណាទេ អាចថាអារម្មណ៍មួយគេគិត Firmino ធ្លាប់ជាអតីតមិត្តចាស់កាន់ឆ្នាំ តែបើមើលភាពចាញ់ឈ្នះលើទីលាន ទង្វើនោះគឺមិនត្រឹមត្រូវឡើយ ព្រោះអ្នកទាំងពីររាប់ជាគូប្រជែងនឹងគ្នា។ ភ្លាមៗគេឃើញកីឡាករប្រេស៊ីល ដែលមិនចាប់អារម្មណ៍ថាជានរណាលោតមកតោងកខ្លួន ងាកមកក្រោយដល់តែឃើញជាសមាជិកខាង Al Nassr គេក៏បានគ្រវាសដៃ ដកខ្លួនដើរចេញពី Mane ភ្លែត។
