យោង​តាម​កំណត់​ត្រា​ឯកត្តកម្ម​ពិភពលោក Guiness ប្រកួត​ដែល​មាន​ការ​ស៊ុត​ចូល​ទី​ច្រើន​ជាង​គេ​បំផុត​គឺ​ការ​ប្រកួត​រវាង​ក្លឹប AS Adema និង​ក្លឹប Stade Olympique de l’Emyrne (ហៅ​កាត់​ថា SOE) ក្នុង​លីគ​កំពូល​ម៉ាដាហ្គាស្កា​ កាល​ពី​ថ្ងៃ​ទី ៣១ តុលា​ ឆ្នាំ ២០០២។

មូល​ហេតុ​ដែល​នាំ​ឲ្យ​ការ​មាន​គ្រាប់​បាល់​ដ៏​ច្រើន​សន្ធឹកសន្ធាប់​នេះ គឺ​មិន​មែន​មក​ពី​ក្រុម​មួយ​ខ្លាំង​ពេក ឬ​ក្រុម​មួយ​ខ្សោយ​ពេក​នោះ​ទេ។ ទាំង​ក្រុម AS Adema និង​ក្រុម SOE គឺ​ជា​សុទ្ធ​សឹង​តែ​ជា​ក្រុម​ខ្លាំង​ប្រចាំ​ម៉ាដាហ្គាស្កា។ កាល​នោះ​ក្រុម​ទាំង​ពីរ​គឺ​ប្រកួត​ប្រជែង​គ្នា​យ៉ាង​ស្វិតស្វាញ​ដើម្បី​ដណ្ដើម​ពាន​លីគ​កំពូល​របស់​ម៉ាដាហ្គាស្កា។
ហេតុ​ដែល​នាំ​ឲ្យ​មាន​លទ្ធផល​ដែល AS Adema ឈ្នះ SOE ដល់​ទៅ ១៤៩ ទល់​នឹង​ ០ នេះ គឺ​ដោយ​សារ​ក្រុម SOE ស៊ុត​ចូល​ទី​ខ្លួន​ឯង​ចំនួន ១៤៩ ដង ពោល​គឺ​រៀងរាល់​ ៣៦ វិនាទី​ម្ដង។ ការណ៍​ដែល SOE ធ្វើ​បែប​នេះ គឺ​ដោយ​សារ​ពួក​គេ​ចង់​សម្ដែង​ការ​មិន​ពេញ​ចិត្ត​ទៅ​លើ​អាជ្ញាកណ្ដាល​របស់​លីគ​កំពូល​ម៉ាដាហ្គាស្កា។

មុន​នឹង​លេង​ការ​ប្រកួត​ជាមួយ AS Adema ក្លឹប SOE ត្រូវ​លេង​ប៉ះ​ជាមួយ​ក្លឹប DSA Antananarivo។ លទ្ធផល​បាន​បញ្ចប់​ត្រឹម​លទ្ធផល ២ ទល់​នឹង ២។ លទ្ធផល​នេះ​មាន​ន័យ​ថា SOE បាន​បាត់​ឱកាស​លើក​ពាន​លីគ​កំពូល​ម៉ាដាហ្គាស្កា​នា​រដូវ​កាល​ ២០០១/២០០២។ SOE មិន​ពេញ​ចិត្ត​នឹង​លទ្ធផល​ស្មើ​នេះ​ឡើយ ព្រោះ​អាជ្ញាកណ្ដាល​បាន​ផ្ដល់​បាល់​ពិន័យ​ ១១ ម៉ែត្រ​យ៉ាង​ចម្រូងចម្រាស​នៅ​ចុង​ម៉ោង ធ្វើ​ឲ្យDSA Antananarivo អាច​តាម​ស្មើ ២ ទល់ ២។ នេះ​ជា​ដើម​ហេតុ ដែល​នាំ​ឲ្យ SOE មិន​ពេញ​ចិត្ត ហើយ​បង្ហាញ​អារម្មណ៍​នេះ​ឡើង​តាម​រយៈ​ការ​ធ្វើ​ចាញ់ ហើយ​ចាញ់​រហូត​ដល់​ទៅ ១៤៩ គ្រាប់​ពេល​លេង​ប៉ះ​ជាមួយ​ AS Adema ក្នុង​ប្រកួត​បន្ទាប់។

AS Adema បាន​លើក​ពាន​ក្នុង​រដូវ​កាល​នោះ។

ក្រោយ​ធ្វើ​លេង​ជា​ចាញ់​បែប​នេះ SOE បាន​រង​ពិន័យ​ ព្រោះ​ធ្វើ​ខុស​នឹង​ច្បាប់​ផ្សេងៗ​របស់​បាល់ទាត់។ គ្រូ​បង្វឹក​របស់ SOE ត្រូវ​បាន​ផ្អាក​មិន​ឲ្យ​ដឹកនាំ​ប្រកួត​រយៈ​ពេល ៣ ឆ្នាំ ហើយ​កីឡាករ​មួយ​ចំនួន​ទៀត​សុទ្ធ​តែ​រង​ការ​ពិន័យ​ផ្សេងៗ​ចំពោះ​ហេតុ​ការណ៍​នេះ។

ម៉ាដាហ្គាស្កាគឺជា​​ប្រទេស​កោះ​ធំ​មួយ​ស្ថិត​នៅ​ភាគ​អាគ្នេយ៍​នៃ​ឆ្នេរ​សមុទ្រ​អាហ្វ្រិក ហើយ​​មាន​​ប្រជាជន​ប្រមាណ ៣០ លាន​នាក់៕

ប្រភព៖ Sabaynews